Nuuk: Politiit tunillaassuunnernik misissuipput

"Politiit tunillaassuunnermik ataqatigiissakkamik misissuipput – tassa imaappoq tunillaanerup sumi pinngornera aammalu allanut ingerlatinneqarsimanersoq misissorigut," politimester Bjørn Tegner Bay oqarpoq. 

Tassa imaappoq politiit inunnik, tunillatsissimasunik ilaqarsimasinnaasunik, misissuisarput. Inernera peqqissutsimut oqartussanut ingerlateqqinneqartarpoq, taakkulu tunillatsissimasinnaasut misissortarpaat aammalu aneqqusiunnaarnissamut suliassat il.il. suliarisarlugit.

Inassutitut maannamut atuuttut suli atuupput

Paasineqartut marluk nutaat Nuummi innuttaasunut inassutinik, tuniluuttoqannginnissaa anguniarlugu pingasunngornermi killilersuinerusunik, allanngortitsillinngillat.

Nuummi inassutit nutaat uani takusinnaavatit: 

Nuummi Covid-19-ip tuniluunneranut killilersuinerit nutaat
Nuummi inassutit erseqqissaaviginerat

Politimesterip naqissuseqqippaa innuttaasut tamarmik oqartussat inassutaannut malinneqqissaaqqullugit:

"Tuniluunnerup pinngitsoortinnissaa ataatsimoorluta aammalu ataasiakkaatut akisussaaffigaarput, taamaammat pingaaruteqarluinnarpoq kikkut tamarmik akisussaaqataallutik oqartussat innersuussutaannik malinninnissaat. Assat eqqiluitsuutilluarnissaat allanullu qanillinaveersaarnissaq pingaaruteqarput," Bjørn Tegner Bay oqarpoq.

Nakorsaanerup nittartagaani uani malinnaagit: www.nun.gl 

Tuniluuttoqannginnissaanut siunnersuutit nalinginnaasut

• Qanillinaveersaarit - inuit amerlasuut najuuffigisaaniinnaveersaarit
• Assatit errortukulakkit assannullu spriti atortaruk
• Quersorniaruit imaluunniit tangajorniaruit tallit atoruk – assatit atornagit
• Qisernaveersaarit – allanut tuniluutsitsilersinnaavoq
• Eqqiluisaarnissaq eqqumaffigiuk – angerlarsimaffinni aammalu suliffinni

Nuummi killilersuinerit immikkut ittut

Nuummiit aallartoqarnissaa aammalu inuit qulinik amerlanerusut katersuunnissaat atuukkallartussamik pingasunngornermi inerteqqutaalerput:

 

"Inerteqquteqarnikkut tuniluunnerup killilersimaartinnissaa siunertaavoq, qanimut malinnaavugut inerteqqutit malinneqarnersut.
Unioqqutinneqassagaluarpata qisuariniarnissatsinnut piareersimavugut. Kisianni Nuummi innuttaasut innersuussutinut malinnippasipput – tamannalu qutsatigaara," Bjørn Tegner Bay oqarpoq.

Inerteqqutit tamanut ammasumik aammalu namminerisamik katersuutsitsinernut, aaqqissuussinernnut, silami illillu iluani, atuupput.

Namminerisamik angerlarsimaffiit pulaarnerit inerteqqutini pineqanngillat, kisiannili oqartussat sakkortuumik innersuussutigaat peqataasussat ikilisinneqarnissaat imaluunniit namminerisamik angerlarsimaffimmi katersuutsitsinerit taamaatinneqarnissaat:

"Oqartussat innersuussutaasa malinneqarnissaat sakkortuumik inassutigerusuppara: Maannakkuugallartoq katersuutsitsinerit killilersimaarsigit taamaatillugilluunniit. Suut tamarmik nalinginnaasumik ingerlaqqilernissaannut kinguartitsigitsi," politimester Bjørn Tegner Bay oqarpoq.

Oqartussat innersuussutaat uani takusinnaavatit

 

Nutaarsiassaq pisumut attuumassutilik

Politimesteri: Eqqissillusi pigitsi oqartussallu innersuussutaat malissigit (20-03-2020)