Corona pillugu Nunatsinni tamanut SMS-ikkut paasissutissaq
Corona pillugu immikkut ittumik TELE-POST suleqatigalugu, maanna nunatsinni oqartussat Nunatsinni tamarmi mobiltelefonimik pigisaqartunut SMS-ikkut nalunaarutinik nassitsisinnaalerput
Nunatsinni Coronavirusip akiorniarneqarnerani TELE-POSTip oqartussat Nunatsinni tamanut mobiltelefonilinnut nunatsinniittunullu upalungaarsimanermi SMSimik nassitsinissaannut periarfissippai.
"Atortuusinnaasut tamaasa atorlugu Coronavirusi akiorniarneqassaaq, pisumilu pingaaruteqarpoq innuttaasut ilisimatinneqartarnissaat nalussanngikkaallu qanoq iliussallutik. Taamaammat pisariaqalissappat amerlasuunut toqqaannartumik paasissutissiissalluni SMS pitsaasuuvoq sukkasuujullunilu", Naalakkersuisut siulittaasuat Kim Kielsen oqarpoq.
Oqartussanit pingasuusunit, peqatigiillutik tunillatsaaliuinermi aqutsisuusunit – tassaasut Naalakkersuisut, Nakorsaaneqarfik aammalu Kalaallit Nunaata Politiivi – SMS siulleq sisamanngornermi nassiunneqassaaq.
"SMS innersuussutitsinnik malinninnissamut kaammattuissaaq – qanillinaveersaarit assatillu errortukulakkit – taamaaliornikkut tuniluunneq unikaallatsinneqarsinnaammat. Tamat taakku malippatigit, virusi ajornartorsiulissaaq," nakorsaaneq Henrik L. Hansen oqarpoq.
Politiit innuttaasunut qanimut sukkasuumik ingerlaavartumillu atassuteqartuarput, ujaasinerniit annertuumik pinerlunnernut pineqaraangata. Taamaammat SMSimik nassitsisarneq Kalaallit Nunaata Politiivini, oqartussaasuni ataqatigiissaarisuusuni, aqunneqassaaq.
"Suliuaannarpugut, ulloq unnuarlu nuna tamakkerlugu malinnaajuarpugut pilertortumillu qisuariarsinnaalluta – taamaattumik upalungaarsimanermi SMSimik nassitsisarnerup politiinut tunniunneqarnera pissusissamisuuginnarpoq", politimester Bjørn Tegner Bay oqarpoq.
Innuttaasut nassittaqattaarnissaat anguniagaanngilaq, immikkulli illuinnartunik pisoqaraangat atorneqartarumaarpoq.
Piviusut nun.gl-imi ataatsimoortinneqarput
Innuttaasunut paasissutissiinermut ilaatillugu, Coronavirusi pillugu piviusut aammalu Covid-19-imut ilisarnaatinut attuumassuteqarnerpaat Nunatta Nakorsaaneqarfiata nittartagaani ataatsimut iliorarneqarnikuupput:
Erseqqissaatigissavarput piviusut pillugit paasissutissat kalaallisut, qallunaatutu tuluttullu pigineqalermata.
Pressekontakt
Presse- og kommunikationsmedarbejder Camilla Palmann
E-mail: CPA013@politi.dk
Telefon: 365144