Sulisitsisut amerlasuut pillagaasimanermut allagartamik perusuttarput, tassa sulisussanik nutaanik ivertitsinialeraangamik. Nammineerlutit politiinnut saaffiginninngikkaluarlutit maannakkut ilinnut tunngasumik pillagaasimanermut allagartamik inniminniisinnaalerputit nittartakkatigullu nassiutsillugu.
Pinerluttulerinermi inatsit unioqqutissimagukku pinerluttuliorsimallutillu, pinerluttulerinermut inatsit, inatsit aanngajaarniutinut tunngasoq, taavaa taakku pillagaasimanermut allagartami ilinnut tunngasumi allassimassapput. Pillagaasimanermut allagartaq ilinnut tunngasoq tassaavoq allagartaq uppernarsaat, paasissutissanik pinerluttuliorsimaninnut, akiliisitaasimanernut aamma inatsisinik unioqqutitsinermi unnerluunneqarsimanerit unitsitsiinnarneqarsimasut tunngasunik imalik.
Online
Pillagaasimanermut allagartamik ilinnut tunngasumik inniminniiniaruit, taava tamanna nittartakkakkut politiit imminut kiffartuulluni atortorissaarutai atorlugit pissarsiarineqarsinnaavoq. Allatut oqaatsigalugu nittartakkamut innersuunneqassaatit. Pillagaasimanermut allagartamik inniminniiguit, taava taanna digitalikkut e-boksikkut tigujumaarpat. Malugiuk imminut kiffartuulluni atortorissaarut taamaallaat qallunaatuujummat.
Pillagaasimanermut allagartamik ilinnut tunngasumik nittartakkakkut piniaruit, taava makku pigissavatit:
- NemID
- Allakkanut issoraavik digitaliusoq (e-boks).
Nammineerluni saaffiginninneq
NemID-qanngikkuit taava nammineerlutit politiinut saaffiginnissaatit immersugassarlu immersorlugu, taanna politeeqarfinni ilinnut tunniunneqassaaq.
Politinut saaffiginnikkuit pillagaasimanermut allagartamik piniarlutit, taava uku nassassavatit:
- Immersugassaq immersoriigaq
- Asseq, kinaassutsimut uppernarsaat, taanna pisortanit suliarineqarsimassaaq, soorlu passi, ingerlatitsisinnaanermut allagartaq, akileraaruteqarnermut allagartaq, kuisinnermut allagartaq imaluunniit sumi najugaqarnermu uppernarsaat.
18-it inorlugit ukioqaruit, taava angajoqqaatit ilinnulluunniit akisussaasup immersugaq atsiussavaat, tamakku pereerpata pillagaasimanermut allagartaq ilinnut tunngasoq tunniunneqarsinnaalissaaq.
Malugiuk
Pillagaasimanermut allagartaq akeqanngilaq.