Politiinngorniarfimmi aallartigit
Ulluinnaat pissanganartut takorloorpigit, suleqatigiilluarneq atorfeqarnissamut periarfippassuit? Taava Politiinngorniarfimmut ilageriartigut!
Politiitut ilinnarsimasutut inuiaqatigiinni inoqatinnilu immikkut ittumik naleqalersitsissaatit. Tamanna ilutigalugu atorfeqalissaatit illit nammineq nuannarinerusannut sammititannik, taamattaaq sinerissami tamarmi sulinissamut periarfissat ammassapput.
Politiinngorniarneq ukiunik marlunnik qaammatinillu sisamanik sivisussuseqarpoq, piffissami tassani atuartinneqartarlutillu miseleraallutit sulisinneqartassaatit. Ilinniarnerit tamaat akissarsiaqartinneqassaatit, aamma suliannut atatillugu inissannik atorsinnaasannik tunineqassaatit.
Piumasaqaatit arlallit qinnuteqarsinnaaninnut naammassineqaqqaartariaqarput. Soorlu 21-nik ukioqalereersimassaatit, ilinniarnertuunngorniarfimmi atuarsimallutit, inuussutissarsiummik ilinniarsimasuullutit imaluunniit tuluartumik misilittagaqarsimallutit. Qallunaatut allallutillu oqalussinnaasariaqarputit (imaluunniit ilinniarnissaannut piumassuseqarlutit). Tiguneqarnissannut piumasaqaatit arfineq-marluk pillugit uani atuarsinnaavutit Politiinngorit.
Ilinnut naleqquppasippa? Uani sukumiinerusumik atuarit Politiinngorniarfik.
Reservebetjentinngorit
Nalunngiliuk tungujortunik uniformeqarsinnaasutit naak politiitut ilinniarsuunngikkaluarlutit aamma politiit suliassaannik suliaqarsinnaallutit?
Kalaallit Nunaata Politiivini reservebetjentitut politiit suliassaanni arlalissuarni ikiueqataasinnaavutit aqqusinermi aamma politeeqarfimmi. Reservebetjentit patruljertunut ilaasarput, pisut pillugit allallutik, innuttaasut saaffiginnissutaat tigusarlugit allarpassuarnillu suliaqartarlutik.
Inuusuttorpassuit politiinngorniarfimmut qinnuteqartinnatik reservebetjentiusarput paaserusullugu poltiitut ilinniassanerlutik. Allat reservebetjentitut suliamik saniatigut sulisarput tamanna (aningaasarsiallu) naammaquserniarlugit poltiini pissanganartumik taamaasillutik atorfeqartarput.
Sunaluunniit tunngavigalugu Kalaallit Nunaata Politiivini reservebetjentitut qinnuteqassagaluaruit, taava tikilluaqquneqangaarputit. Periarfissatit pillugit paasisaqarusukkuit, taava uunga allassinnaavutit grl-stab-hr@politi.dk.
Kommunefogedinngorit
Nunaqarfiit tamarmik inummik ajunngitsumik tunniusimasumillu kommunefogedimik pisariaqartitsipput! Kommunefogedimmi Kalaallit Nunaata Politiivini pingaarutilittut inissisimasuupput, tassami nunaqarfinni politiitut sulipput.
Kommunefogedip pingaarnertut nunaqarfimmi eqqissisimasumik toqqissimasumillu inuuneq isumannaallisassavaat, aamma nunaqarfimmiut politiinik ikiorneqassamik pisariaqaritsigaangata taanna ornittassavaat. Pinerluttoqarsimanerani misissuinerit aallartisarlugit suleqquneqarsinnaapput, tassa killisiuillutik, assiliillutik imaluunniit uppernarsaatinik isumannaarinnillutik.
Aamma allaffissornikkut suliaqartitaasinnaapput, soorlu akiliisitsinissanik isumannaarillutik imaluunniit oqariartuutit inunnut ataasiakkaanut eqqortumik ingerlateqqittarlugit.
Soorunami tamakkununnga tunngasut tamarmik ilinniartitsissutigineqartarput!Ilinniarnerup ingerlanneqarnerata saniatigut aamma politiitut uniformit, politiip anaataa aamma paffequtit savimiusut sulinermi atortussat tunniunneqartarput.
Kommunefogediuneq piffissaq tamakkerlugu suliffiunngilaq - kisianni suliffiup pingaarup saniatigooralugu suliaalluni pissanganartoq. Piumasaqaatituuaavoq pinerlussimannginnermut allagartaqarneq, ajunngitsumik tusaamaneqarneq aamma nunaqarfimmiut toqqissisimallutik inuunissaannik kissaateqartoq.
linnut naleqquppasippa? Uani sukumiinerusumik atuarit Kommunefogedinngorit.
Kommunefogedinngornissamut periarfissat pillugit uani sukumiinerusumik paasisaqarit uunga allallutit grl-stab-hr@politi.dk.
Politiini allaffeqarfinninni suleqataalerit
Kalaallit Nunaata Politiivini suliniaraanni taava pisariaqanngilaq politiitut ilinniarsimaneq. Sulisorpassuuvugummi assigiinngitsorpassuarnik tunuliaquteqarluta sulisugut. Naak oqartussaasunut ilaagaluarluta , taava suliffeqarfiit allatuulli aningaasanik aqutsinerup tungaatigut, inatsisilerituunik, ikiortinillu (studentermedhjælpere) - allarpassuarnillu sulioqarpugut.Taamaattumik akuttunngitsumik sulisussarsiortarpugut assigiinngitsunik ilinniagaqarsimasunik aamma misilittagalinnik, taakku ikorfartuiqataapput, naak politiit suliassaannik toqqaannartumik suliaqanngikkaluarlutik, taakkuli suut tamarmik ajunngitsumik ingerlanissaannik suleqataapput.
Tamakku ilinnoorpaluppata, taava sulisussarsiortarnivut alaatsinaakkit! Immaqa illerpiaavik illillu sapinngisatit atorfissaqartippavut.