Spring til hovedindhold
Vi har lanceret en grønlandsksproget version af Grønlands Politis hjemmeside. Hvis du savner den dansksprogede, finder du den her.

Siunnersuutit

{{result}}

Meeqqanik sullissisuuit?

Sulininnut atatillugu meeqqanik sullissinermut siunnersuutit ilitsersuutillu.

Pigen

Ilinniartitsisutut, perorsaasutut, timersoqatigiiffimmi kajumissutsinnik sulininni allatulluunniit sulininni meeqqap kinguaassiuutimigut atornerlunneqarsimaneranik pasitsaassaqaruit, pasitsaassavit qisuariarfiginissaa pingaaruteqarpoq, taamaalilluni meeraq ikiorneqassammat atornerluinerillu unitsinneqassammat.

 

Taamak pasitsaassinermi apeqquterpassuit pilersinnaasarput, taamaammallu oqarasuaatikkut siunnersuisarfimmik aallartitsivugut, illit suliaqartutut pineqartumi immikkut ilisimasalinnik oqaluussisinnaaniassagavit.

Oqarasuaammut siunnersuisarfimmut ulluinnarni nal. 9-15-imut 25 54 34-mut sianerfigisinnaavatsigut.

 

Eske oqarasuaatikkut siunnersuisarfik pillugu nassuiaasoq tusaajuk

 

Pasitsaassaqarninni qanoq iliorsinnaanerit pillugu quppersagarput aajuk

 

Aammattaaq apeqqutit nalinginnaanerpaat akissuteqarfiginikuuagut.

 

Meeqqat kinguaassiuutimikkut atornerlunneqarsimanerannik nalunaarutiginnittarneq pillugu immiussaq atortussallu ugguuna aakkit

Kinguaassiuutitigut atornerlugaasoqarsimaneranik pasitsaassaqarnermi apeqqutigineqarnerusartut taakkulu akissutaat

Qaqutigoorluinnarpoq meeqqap atornerlunneqarsimasup erngerluni pisumik oqaluttuartarnera. Inersimasup kanngutsaatuliortup meeraq peqqusersiorfigalugu kanngunartuliorfigisarpaa ima kingunilimmik meeraq pisooqataasutut allaat misigilersillugu.

 

Meerarli eqqarsaqqaarani oqariataarsinnaasarpoq taamaasillutit illit sullissisutut isumaginnittutullu atornerlunneqarsimaneranik malussalersissinnaallutit.

 

Meeqqami ersiutaasinnaasut ersarluttarput, tulliuttulli illit maluginiarsinnaavatit:

 

  • Meeqqap pissusaa allanngorpoq. Nikallungalersinnaavoq inussiorunnaarlunilu, imaluunniit kamattunngorluni puffajasunngorlunilu
  • Meeqqap aallussisinnaanera allanngorpoq sininniarnerminillu ajornartorsiuteqalerluni
  • Timimini assigiinngitsunik anniartalerpoq
  • Atornerlunneqarsimanerup kingunitsiaa atoqatiginiarneqarsimanerup kinguneranik imaluunniit kinguaassiuutimigut attuuaneqarsimanerup kingunerisaannik aanaarsinnaavoq. Meeraq kinguaassiuutimigut anniarsinnaavoq aamma qasilisitsisinnaavoq quinerminilu anniartarluni
  • Neriniarnermigut ajornartorsiuteqalersinnaavoq allanillu meeqqap ajorsiartornera malunnaateqalerluni

    Uani ersiutit meeqqami takuneqarsinnaasut allat alaatsinaasinnaasatit takusinnaavatit

Ilinniartitsisutut imaluunniit perorsaasutut sulininni meeqqap kinguaassiuutimigut atornerlunneqarsimaneranik pasitsaassaqaruit, pasitsaassavit qisuariarfiginissaa pingaaruteqarpoq, taamaalilluni meeraq ikiorneqassammat atornerluinerillu unitsissinnaassammata.

Amerlanertigut oqaaseq ataaseq arlaatigulluunniit oqaaseqarneq isumaalutsitsisinnaavoq - taava qanoq iliussavit?

 

Meeraq oqaloqatigiuk

Aallarniutigalugu meeraq oqaloqatigiuk, taamaalillutit qanoq pisoqarsimaneranik paasisaqarnerussagavit pasitsaassallu uppernarsarsinnaassagakku. Meeraq killisiussallugu eqqarsannginnissat pingaaruteqarpoq. Qanorli pisoqarsimanera ammasumik apersuutigiuk.

Apeqqutit ammasut atorukkit ajunnginnerussaaq assersuutigalugu: Susoqarami? Kina taamaaliorami? Qanoq iliorami? Ammasumik apersuiguit meeqqap uppernassusaa annertusassavat, meerarlu qalliinnarlugu oqalunnissat annikillisissallugu.

Oqaloqatigiinnersi allaguk - apeqqutit akissutillu - ajornanngippat meeqqap nammineq oqaasii oqaaseqaataalu.

 

Oqarasuaammut siunnersuisarfimmut attavigisigut

Imaassinnaavoq suliffeqarfissinni atuarfissinniluunniit atornerlunneqarsimasumik pasitsaassaqarsimagussi nammineerlusi iliuusissatut malittarisassaqareersusi. Amerlanertigut aqutsisorisat suliaq pillugu oqaloqatigisussaavat, pasitsaassinissilu inunnik isumaginnittoqarfimmut politiinullu qanoq nalunaarutiginissaanut pilersaarut malissallugu.

Kalaallit Nunaata Politiivini oqarasuaat siunnersuisarfik oqarasuaat 25 54 34 ulluinnarni nal. 9-15-imut attavigisinnaavarsi tassanilu siunnersortillusilu ilitsersuunneqarsinnaavusi. Pisussaanngilasi, oqarasuaammullu tassunga sianerninni nalunaarutiginninnavianngilatit, kisiannili suliap pitsaanerpaamik qanoq ingerlanneqarsinnaaneranut immikkut ilisimasalimmik oqaloqateqarsinnaassaatit.

 

Isumaginninnermik oqartussat paasitikkit

Meeqqap kinguaassiuutitigut atornerlunneqarsimaneranut pasitsaassinermi, illit sulialittut pisussaatitaavutit inunnik isumaginnittoqarfimmut nalunaaruteqarnissannut.

Inunnik isumaginnittoqarfik paasitereerussiuk, erngertumik politiinut nalunaarutigissavaat. Nuummi suliguit malittarisassat allat atuupput. Tassani nammineerlutit politiinut nalunaarutiginnissaatit, saniatigullu kommune paasitissallugu.
Meeqqap atornerlunneqarsimaneranut eqqasuuteqaruit pingaaruteqarpoq kommuunimut nalunaarutiginissaa. Kommuunip akisussaaffigaa politiinut ingerlateqqissallugu.

Pisoq pillugu apersuinaveersaarit, politiilli meeraq oqaloqatigissavaat, tassanilu misissorneqarumaarpoq pinerluttuliornermi inatsit unioqqutinneqarsimanersoq, apersuinerlu isumagalugu.

Pisoq pillugu apersuinaveersaaraluarlutit pingaaruteqarpoq nalunaarutigereernerup kingorna meeqqamut isumassuinissat kiisalu tusarnaarluarnissaa.
Naammappoq politiinut saaffiginnitsinnak peqquteqarlutit pasitsaassaqaruit. Peqquteqarluni pasitsaassaqarneq tassaasinnaavoq immikkut ittunik paasissutissanik imaluunniit oqaatigineqarsimasunik nalunngisaqarneq - imaluunniit immikkut ittunik malugisaqarsimaneq - atornerluisimanermut tikkuusisunik.

Pisariaqanngilaq paasissutissanik nassuiaataasunik peqassasutit aamma meeraq piviusunik annikitsortalinnik apersussanngilat.

Kikkulluunniit meeqqamik atornerlunneqarsimasumik pasitsaassaqartut imaluunniit nalunngisaqartut politiinut nalunaaruteqarsinnaapput. Pinerlineqarsimasoq nammineq, isumaginninnermut tunngasunik oqartussat, pinerlineqarsimasup ilaqutai imaluunniit illit meeqqanik sullitalik.

 

Innuttaasutut meeqqanut ikiuiniarnermi inatsit (børnestøtteloven) §15 malillugu meeraq 18-it inorlugit ukiulik atornerlunneqarsimappat kommuunimut kalerriisussatut pisussaatitaavutit.

 

Sullissisutut sukkannerusumik kalerriisussatut pisussaatitaapput meeqqanut ikiuiniarnermi inatsit § 16 malillugu. Tassani meeqqamik 18-it inorlugit ukiulimmik atornerlugaasimanermut pasitsaakkukku oqartussanut kalerriutigissavat.

Aallartissaatit pasitsaassat pillugu inunnik ikiuinermik sulialinnut kalerriutigissallugu, taakku kalerriut ingerlateqqissavaat politiinullu nalunaarutigalugu. Allaasutigisinnaavaa illit najukkanni ingerlatseriaaseq kalerriisarnermut tunngasoq allatut isumaqatigiissusiorneqarsimappat. Taava aalajangersagaq taanna malillugu iliuuseqassaatit.

 

Oqarasuaatikkut siunnersuisarfipput 25 54 34 aamma atorsinnaavat, taakku siunnersorsinnaavaatsit ulluinnarnilu nal. 09.00 - 15.00-imut ammasarluni.

 

Kinguaassiuutitigut atornerlunneqaruit nalunaarutigiuk

Meeqqap kinguaassiuutitigut atornerlunneqarsimanera inunnik ikiuininermik sulialinnut kaleeriutigigukku taava taakku nalilersussavaat meeraq suneqassanersoq, aamma meeraq siunissami suliassamut pilersaarusiorneqassaaq.

Politiit akuliunneqassapput, inunnik isumaginnittoqarfimmiit saaffigineqarunik. Taava misissueqqissaarneq aallartissaaq, meeraq qajassuartumik apersorneqassaaq, tamanna misissueqqissaarnerup ilagaa.

Apersuineq videokkut apersueqqissaarnermik taasakkatsinnik ingerlanneqassaaq, tassa oqaloqatigiinnerput immiunneqassaaq. Taamaasilluni meeraq eqqartuussivimmi sassartinneqassanngilaq pinerlisimasoq pillugu nassuiaaleruni.

Kinguaassiuutitigut atornerlunneqaruit nalunaarutigiuk
Isumaginninnermi suliallit meeqqap ilaquttaminit peersinneqarnissaa nalilissavaat.

Isumaginninnermi suliallit nalilerpassuk meeraq sumiiffimminiiginnassaguni atornerlunneqaqqissinnaasoq, taava aalajangersinnaapput pitsaanerpaajussasoq meeqqap utaqqiisaagallartumik angerlarsimaffimmi avataanut inissinneqarnissaa.
Meeqqamik atornerluisimaneq kalerriutigissallugu kingusinaartoqarsinnaanngilaq.

Politiilli misissueqqissaarnissaat pillugu pitsaanerpaajussaaq kalerriut sukkanerpaamik tiguneqaruni.
Naamik, illit politiinut kalerriuteqassaguit tamanna meeqqap akuereqqaartariaqanngilaa. Pisussaavutit qanoq iliuuseqassallutit pasitsaassaqaruit meeqqamik kinguaassiuutimigut atornerlunneqarsimasumik.

Politiinukarsinnaavutit meeraq kalerreqqaarnagu.
Isumaginninnermik sullissisut kalerriunneqartoq nalilissallugu, tassa meeraq paarilluarniarlugu arlaatigut illersortariaqarnersoq nalilissallugu.
Meeqqanik sullissisutut isumaginninnermi sullissisut pasitsaassininnik kalerrissavatit. Sulliviit aalajangersimasunik malitassaqarpat kikkut pasitsaassinermi kalerrinneqarnissaat pillugu, taava malitassaq tamanna malissavat. Pasitsaassisorli tassaavoq illit, illillu pisussaavutit isumaginninnermik sullissisut kalerrissallugit.

Qanoq iliornissat pillugu siunnersuisarfipput ugguuna attavigisinnaavat 25 5434, ulluinnarni nal. 09.00 -15.00, taakku siunnersussavaatsit qanoq iliornissannik.
Kalerriussisutut apersorneqassaatit suut tunngavigalugit pasitsaassisimanersutit. Taava taassuma kingorna politiit pisussaalissapput misissueqqissaarneq ingerlatissallugu aamma isumaginninnermi sullissisut nalilissavaat meeqqap qanoq ikiorserneqarnissaa tapersersorneqarnissaalu.

Kalerriussereernerup kingorna meeqqap qanoq atugaqarnera alaatsinaassavat. Atornerlunneqarnermi mikisualuit pillugit meeraq apersussanngilat pingaartuuvorli meeraq tusarnaarlugulu oqaloqatigisassagit.
Meeqqamik atornerlunneqarsimasumik kalerriussigavit taava tamanna piinnarlugu eqqartuussivimmut qaaqqusaasariaqanngilatit.

Kisiannili meeqqanik sullissisutut atornerluineq pillugu ilisimasaqaruit videokkut apersuinermi uppernarsarneqarsinnaanngitsunik imaluunniit misissueqqissaarnermi paasisat eqqarsaatigalugit, taava unnerluussisussaatitaasut ilisimannittutut oqaaseqartussatut aggersarsinnaavaatsit.
Meeqqanik sullissisutut susoqarneranik nalunaarfigineqarnavianngilatit, aatsaalli meeqqamut angajoqqaatut akisussaatitaaguit allatulluunniit. Pinerlineqartoq, taassuma angajoqqaatullu akisussaatitat aamma pasisaq/ unnerluutigisarlu kisimik pisup qanoq ingerlaqqinnissaanik paasitinneqassapput.

Kommune pisoq pillugu paasitinneqassaaq taamattaaq isumaginninnermi suliap naammassinissaanut iliuuseqartussaq, kisianni suliap inernera pinnagu, tassa pisumi peqataanngimmata.