Politi Update Nunatsinni atulissaaq

Politi Update 2026-mi januarimiilli piuvoq, politeeqarfiit allat attaveqaammik nutaamik siullermeersumik atuilermata. Maanna Kalaallit Nunaata Politiivi atuilissapput. Taamaammat ataasinngorneq oktoberip 12-iani Politi Update aqqutigalugu politiit suliaat pillugit Kalaallit Nunaata Politiivisa nalunaarutaat malinnaavigineqarsinnaalissapput.

"Nunatsinni Politi Update'p atulernissaa qilanaarisorujussuunikuuarput. Neriuppugut innuttaasut tusagassiorfiillu attaveqaat nutaaq iluarissagaat, politiit suliassaannik pisoqartillugu malinnaanissamut ajornannginnerulersitsissammat," stabschefiugallartoq Henrik Kjærgaard Berthelsen Kalaallit Nunaata Politiivineersoq oqarpoq.

Politeeqarfiup sinneranut attaveqaammut tapertaq

Tamatuma saniatigut Kalaallit Nunaata Politiivini unnerluussisussaatitaasut Anklager Update atulissavaat, pinerluttuleraluni suliat, ass. unnerluussinerit eqqartuussutillu, eqqartorneqarsinnaalissallutik.

Danmarkimi Politi Update'p inuit attaveqaqatigiittarfiannik X'imik politiit atuinerat taarserpaa. Taamaattorli Kalaallit Nunaata Politiivisa Facebook'imik atuinerat Politi Update'p taarsissanngilaa, attaveqarnerulli sinneranut tapertatut inissisimassaaq.

Siunissami politiit suliaat ingerlasut siullermik Politi Update aqqutigalugu kingornalu innuttaasunut pingaaruteqassappata Facebook'ikkut ilisimatitsissutigineqartassapput. Aammattaaq Kalaallit Nunaata Politiivi mail aammalu politi.gl aqqutigalugit nutaarsiassanik tusagassiuutigigullu nalunaarutinik nassiussisarnertik ingerlatiinnassavaat. Taamaattorli Politi Update tusagassiortuugaanni imaluunniit innuttaasuugaanni malinnaaniarluni paasissutissanik aallerfissaq siulliussaaq.

Uani Politi Update nassaarisinnaavat

politi.gl/politiupdate (kalaallisut) aammalu politi.gl/da/politiupdate (qallunaatut) Politi Update nassaarisinnaavat, maannalu pisartagarilereersinnaavat nutarterinerillu toqqaannaq mailinnut imaluunniit RSS'erisanni feeditut pissarsiarisalerlugit. Aammattaaq Anklager Update.

Politi Update aammalu Anklager Update mobilimi app'itut DK Update'mut ilaapputtaaq, tassani politiiniit unnerluussisussaatitaasuniillu paasissutissat kingulliit ataatsimut takuneqarsinnaassallutik - push-notifikationitut pineqarsinnaassalluni. App'i iOSilinnut App Storemi aammalu Androidilinnut Google Playimi akeqanngitsumik aaneqarsinnaavoq.

Politi Update attaveqaatinik, politiit sulinissaannut pingaaruteqartunik - minnerunngitsumik pinartumik pisoqartillugu - aqutsilluarnerunissaq siunertaralugu pilersinneqarpoq - aammattaaq politiit suliarisaat ingerlasut pillugit paasissutissanik pilertortumik aammalu tatiginartumik innuttaasut akileeqqaaratik pissarsisinnaanissaat anguniarlugu.

Attaveqaat Ritzaus Bureau A/S'imit tunniunneqassaaq, taamaalillunilu nutarterinerit oqartussat nalunaarutaattut Ritzausip nutaarsiassaqartitsiviini nassaarineqarsinnaassapput.