Biilersinnaanermut allagartaq aammalu teoriimik misilitsinneq pillugit malittarisassat nutaat aprilip aallaqqaataa 2026 aallarnerfigalugu atulerput
Pingasunngornermi aprilip aallaqqaataani 2026 biilersinnaanermut allagartaq pillugu maleruagassat arlalinnut pingaarutilinnut allannguutit atuutilerput. Allannguutit teoriimik misilitsinnernik eqaannerulersitsissapput, Nunatsinni qallunaat biilersinnaanermut allagartaannik atuisinnaalersitsissapput aammalu allaffissornikkut aaqqiinerit arlalippassuit atulersissallugit.
Allannguutit annerpaat ilaat tassaavoq teoriimik misilitsinnerup allattariarsorluni misilitsinnertut ingerlanneqartalernissaa. Tassa imaappoq misilitsinneq aaqqissuussaanerulerlunilu assigiinnerusumik ingerlanneqartalissasoq, taamaalilluni qinnuteqartut tamarmik nalilersornissaat allaffissornikkut ajornaannerusumik aammalu assigiinnerusumik ingerlanneqartalissaaq.
Tamakku saniatigut teoriimik misilitsinnermi ilinniartut arlallit ataatsikkut misilitsissinnaalissapput, taamaalillunilu naatsorsuutigineqarpoq teoriimik misilitsinnerit ingerlanneqarnissaannut atatillugu utaqqisut ikilisinneqarnissaat.
Qinnuteqartut immikkut pisariaqartitsisut imaluunniit teoriimik nalinginnaasumik ingerlatsinissamut ajornakusoortitsisut misilitsinnermik immikkut ittumik aammattaaq neqeroorfigineqarsinnaalissapput. Periarfissaq taanna aqqutigalugu innuttaasut tamarmik biilersinnaanermut allagartartaarsinnaanissamut assigiimmik pisinnaatitaalissapput.
Allannguut pingaarutilik alla tassaavoq qallunaat biilersinnaanermut allagartaasa Nunatsinni toqqaannaq akuerineqarsinnaanngornissaat. Tassa imaappoq inuk qallunaatut biilersinnaanermut allagartalik Nunatsinnut nuunnermini kalaallisut biilersinnaanermut allagartamik pisaartariaqassanngitsoq.
Inuit, qallunaatut biilersinnaanermut allagartartaarsimanngitsut, kalaallisut biilersinnaanermut allagartartaarniarlutik qinnuteqaammik tunniunnissinissaannut killigitinneqartoq sivitsorneqassaaq. Siornatigut qinnuteqartut, nunani allamiutut biilersinnaanermut allagartallit, Nunatsinnut nuunnerminni ullut 14-it iluanni qinnuteqaammik tunniussisussaasarnikuupput. Killigitinneqartoq taanna ullunut 60-inut sivitsorneqarpoq Nunatsinnut nuuttut kalaallisut biilersinnaanermut allagartartaarusuttut periarfissaqartinneruniarlugit.
Innuttaasunut biilernermillu ilinniartitsisunut kaammattuutigissavarput maleruagassat nutaat alaatsinaaqqullugit. Biilersinnaanermut allagartaq pillugu maleruagassani allannguutit nutaat aammalu teoriimik misilitsinnissat atulernissaat Kalaallit Nunaata Politiivisa qilanaaraat.
Tusagassiuutinut attavik
Tusagassiuutit saafiginnissagunik una attavigissavaat grl-presse@politi.dk imaluunniit +299 567140.