Nutartigaq - Ikuallattoq Uummannami

Oqartussat Uummannami ikuallattoqarnerata kingunerisaanik innaallagissamik pilersuileqqinniarsaripput.

Uummannami innaallagissiorfimmi ullumi ikuallattoqarpoq. Politiit qatserisartullu pisumik isumaginnillutik suli pisoqarfiusumiipput.
Kalaallit Nunaanni Upalungaarsimasoqatigiit pilersinneqarput, oqartussallu ingerlaavartumik suleqatigiillutik ataqatigiissaaripput.
Ikuallattoqarnerani innaallagissamik pilersuineq taamatullu illoqarfimmi oqarasuaatit internettimullu attaviit unitsinneqarput. Nukissiorfiilli innaallagissamik pilersuinermik pilersitseqqinniarlutik sapinngisamik sukataarlutik suliaqarput, suliassarli annertuvoq. Illoqarfinnit allanit ajornartoornermi generatorinik pissarsiortoqarpoq, taakkulu aqagu unnukkut tikiunnissaat naatsorsuutigineqarpoq.
Kalaallit Nunaanni Upalungaarsimasut innuttaasunut, sanaartugassanik suliassinneqartartunut suliffeqarfinnullu Uummannami ajornartoornermik generatoreqartunut periarfissaqarunik taakkuninnga upalungaarsimasunut atukkeeqqullugit kaammattuuteqarput.

Uummannami timersortarfik innuttaasunut imermik kissartumillu pisariaqartitsisunut ammatinneqarpoq.

KNR unnuup ingerlanerani radiokkut nalunaaruteqartassaaq, innuttaasunut paasissutissanik kingullernik oqartussallu innersuussutaannik pissarsiniarlutik aallakaatinneqartunut malinnaanissaannik kaammattuuteqarfigineqarput.

Oqarasuaatikkut attaveqartoqannginnerani politiit, peqqinnissaqarfik annaassiniarnermillu suliaqartut pisariaqartinneqassagaluarpata innuttaasunut napparsimmavimmut politeeqarfimmulluunniit ornigunnissaannik kaammattuuteqarfigineqarput.