Politiit ilisarnaat nutaamik pissapput
Kalaallit Nunaanni Politiit, Danmarkimi Savalimmiunilu politiit assigalugit politiit ilisarnaat nutaamik pissapput. Ikaarsaariarnermi sivikitsumik pisoqarfimmi politiit ilisarnaataa pisoqaq nutaarlu atorneqartut takuneqarsinnaassapput, Kalaallit Nunaanni tamakkerlugu taarsersuineq naammassineqarnissaata tungaanut.
.jpg?h=2000&iar=0&w=3000&hash=FF6A524E094FBEDF9D58656BB2FFCC3A)
Politiit ukiuni 32-ni politiit ilisarnaataat atoreerlugu, maanna politiit ilisarnaataanik nutaamik pissapput. Tamanna soorunami aamma Kalaallit Nunaanni Politiinut atuuppoq. Politiit ilisarnaataat nutaaq atorneqassaaq politiit ilisarnaataat peqquserlulluni sananeqarsimasunik atuisarneq ajornarnerulersinniarlugu, kiisalu innuttaasunut sulisunullu tamanut isumannaallisaanermik nukittorsaanissaq siunertaralugu.
Isikkua allanngortinneqarsimanerata saniatigut allannguut pingaarnerpaaq tassaavoq sulisup aqqa ID-normumik taarserneqarmat. ID-normu tassaavoq sulisup nammineerluni normua, taanna aamma politiit atisaanni takuneqarsinnaavoq. Taamaalilluni innuttaasoq sulisup aqqa tamarmiusoq aperisariaqarunnaarpoq, kisianni ID-normu politiit ilisarnaataanni uniformimilu allassimasoq nalunaarutigisinnaallugu.
Politiit illisarnaataat nutaaq atulersinneqalerpat kikkut politiit ilisarnaatanik peqassanersut pillugu periuseq allanngortinneqassaaq. Politiit ilisarnaataat maanna atorneqartut taarsersorneqarnissaat saniatigut siunissami politiit ilisarnaataat nutaaq aamma tunniunneqartalissaaq, misissuisartut nalinginnaasumik atisallit, kommunefogedit, Tunumi Avannaani Nunap Eqqissisimatitaasup iluani sakkutuujusut kiisalu Kalaallit Nunaanni mittarfiit pisortaasa ilaannut.
Sulisut politiiunngitsuq ukioq manna kingusinnerusukkut ilisarnaammik nutaamik pissapput, tassani politiinut attuumassuteqarnertik ersarissumik takuneqarsinnaassalluni. Unnerluussisut immikkut unnerluussisutut ilisarnaataat attatiinnassavaat.
Kalaallit Nunaanni politiit ilisarnaataat taarsersorneqarnissaat 3. juni 2026 aallartissaaq. Piffissami sivikinnerusumi tulliuttumi aqqusinermi politiit ilisarnaataat marluk assigiinngitsut takuneqarsinnaassapput – pisoqqat nutaallu.
Politiit ilisarnaataat eqqortuunera pillugu nalornissuteqaruit politiqarfimmut qaninnermut attaveqaqquneqarputit.
Kalaallit Nunaat tamakkerlugu taarsersuineq naammassineqarpat tusagassiorfinnut nalunaarummik nutaamik saqqummiissaagut.
Ataani politiit ilisarnaataata nutaap assinga ilanngunneqarpoq.
Tusagassiuutinut attavik
Tusagassiuutit saafiginnissagunik una attavigissavaat grl-presse@politi.dk imaluunniit +299 27 95 49.