Qimussertartoq ukiuni pingasuni pisinnaatitaaffiiarlugu pineqaatissinneqarpoq

Ataasinngornermi juulip 13-iani suliami qimminut qimittunut kiisortunut tunngasumi eqqartuussisoqarpoq.

Suliaq Sisimiuni Kangerlussuarmilu 2023-mi martsimi aprilimilu qimmit qimuttut kiisortut pillugit pisimasunut pingasunut tunngavoq. Pisuni pingasuni unnerluutigineqartup qimmii qimuttut inunnut, ilaatigut illinertigoortunut, saassussisimapput.

Qeqqata Eqqartuussisoqarfiata eqqartuussutaani martsip 18-ianeersumi 2025 pisimasut pingasut pillugit unioqqutitsisoqarsimasutut ukiuni tallimani utaqqisitamik pisinnaaffiiaasoqarpoq.

Nunatta Eqqartuussisuuneqarfiata unnerluutigineqartoq pisimasumut siullermut, 2023-mi martsimi pisumut, pinngitsuutippaa, eqqartuussisuuneqarfik isumaqarami taassuma kingorna aatsaat unnerluutigineqartup paasisimagaa qimminik qimuttunik kiisortunik peqarluni.

Tamanna tunngavigalugu eqqartuussisuuneqarfiup unnerluutigineqartoq kingorna pisunut, 2023-mi aprilimi pisunut, pisuusutut pineqaatissippaa.
Nunatta Eqqartuussisuuneqarfiata unnerluutigineqartoq pinngitsoorani pisinnaaffiiarneqartussanngorlugu eqqartuuppaa. Pinngitsoorani pisinnaaffiiaaneq imaappoq eqqartuunneqartoq ukiuni pingasuni qimminik qimuttunik peqassanngitsoq imaluunniit suliaqassanngitsoq.

"Eqqartuussutip takutippaa qimminik qimuttunik pigisaqartup akisussaaffigigaa qimmiutimi inunnut navianaateqannginnissaat, kiisalu pisoqarsimatillugu isumannaallisaanerit tamaasa, ilaatigut qimmit pineqartut toqutsinneqassasut, malinnissaat. Isumannaallisaanerit taakku malinngikkaanni, qimminik qimuttunik piginnittumut ilungersunartunik kinguneqarsinnaapput", Aprilia Jespersen, Kalaallit Nunaata Politiivisa Unnerluussisussaatitaasuini unnerluussisuusoq, oqarpoq.